വീഴുമ്പോൾ

വീഴുമ്പോൾ 
പിടികിട്ടാത്ത തുള്ളികളെ 
വേരുകൾ കൊണ്ടെടുത്ത്
ഇലകളിലൂടെ
പറത്തി വിടുന്ന 
മഹാമാന്ത്രികനാണു മരം

കുഞ്ഞ്

മുലകുടിക്കുംമുമ്പ് 
മുഖം തിരിച്ചറിയും മുമ്പ്
ഫെയ്സ്ബുക്കിലവൻ 
അമ്മയെ തിരയുന്നു

ഡിസംബർ! ...........................

എന്തൊരു തണുപ്പ്!
ഒരു വെയിലെടുത്തു 
പുതയ്ക്കാൻ തോന്നുന്നു

തിളക്കം

ദേശാടനത്തിൽ വഴി തെറ്റിയ
കിളിയുടെ കണ്ണിൽ
പുതു വഴിയുടെ തിളക്കം 

മഴ മാത്രം

വീഴ്ചയുടെ
 രസമറിഞ്ഞൊഴുകുന്നു
മഴ മാത്രം

വെയിൽത്തിരകളിൽ
തുഴഞ്ഞുപോകുന്ന തുമ്പികൾ
അരിപ്പൂവിൻ ദ്വീപിലിരിക്കുന്നു

പ്രണയത്തിന്റെ ചിറകിനാൽ
ചില പുഴുക്കൾ പൂമ്പാറ്റകളായ്
ആകാശത്ത് ചിത്രം വരയ്ക്കുന്നു 

ശലഭരാശിയായ് നാം

.................................................
കടലുപൂക്കുന്ന സന്ധ്യയിൽ
സ്വർണ്ണ മണൽത്തരികളിൽ
ശലഭരാശിയായ് നാം സമ്മോഹനം
................................................................

കാറ്റുപോൽ

പുഴ കടക്കുന്നു കിളികൾ
ജലമറിയാതെ നിശ്ശബ്ദം
ചിറകുരുമ്മിയൊരു കാറ്റുപോൽ

വെയിലിലെ ചിത്രകാരൻ

മഴത്തുള്ളിയിൽ
സ്വപ്നം  വരയ്ക്കുന്നു
വെയിലിലെ ചിത്രകാരൻ

മഞ്ഞായിരിക്കുമ്പോൾ

ഇലയിൽ വീഴാതിരിക്കുവാൻ

വയ്യ ,മഞ്ഞായിരിക്കുമ്പോൾ

മധുവിധു വെയിലെത്തും വരെ!

വേദന

വീണു കിടക്കുന്ന മുല്ലപ്പൂവിൽ
നിന്നൊരു വേദന മെല്ലെയിറങ്ങിയെൻ
സന്തോഷത്തിൽ നൂണു കടക്കുന്നു

പ്രണയലിപികളിൽ

വറ്റിപ്പോയ തടാകമുള്ളുപൊള്ളി  

അകന്നുപോയ മഴയ്ക്കെഴുതുന്നു

നാം കൈവിട്ട പ്രണയലിപികളിൽ!

ഓർമ്മയുടെ പുഞ്ചിരി

തുമ്പപ്പൂവിൽ നിന്നും
ഓർമ്മയുടെ പുഞ്ചിരി
വിളിക്കുന്നു;വിതുമ്പുന്നു

നനവുണങ്ങുന്നു!

ഒറ്റയ്ക്ക് നിന്നാകെ നനയുമ്പോൾ
കണ്ണിൽ നിന്നും ചാടിയോടുന്നു
വേദനകൾ ; നനവുണങ്ങുന്നു!

ഓണമൊരു പഞ്ചവർണ്ണക്കിളിയായ്

മഴ മെല്ലെ നടന്നുപോകും വഴി നോക്കി
ഓണമൊരു  പഞ്ചവർണ്ണക്കിളിയായ്
കാട്ടുപൊന്തയിൽ  വന്നിരിക്കുന്നു.

നഖക്ഷതങ്ങളുടെ നീറ്റലിൽ

നഖക്ഷതങ്ങളുടെ നീറ്റലിൽ
ഒരു പീഡനത്തിന്റെ കഥ!
മുള്ള് ചെടിയുടെ നഖങ്ങൾ.

പൂത്തറ

ഓർമ്മയിൽ ചിങ്ങവെയിലേറ്റു
പൂവണിയുന്നു, മിഴിനീരിൽ
നനഞ്ഞുപോയ പൂത്തറ!

പ്രളയം ; പ്രണയം

നാം രണ്ടു ദ്വീപുകൾ!
നാം കൈകോർക്കുന്നു
പ്രളയം ; പ്രണയം

പാതിരാവിൽ

അണിഞ്ഞൊരുങ്ങി ചരിയോടെ
അനുഭവം മിഴിയെഴുതുന്നു
ഡയറിയിൽ പാതിരാവിൽ.

കുളിർ ചൂടിയ കാറ്റായ്

മഴയിതൾ തൊട്ടപ്പോൾ
കുളിർ ചൂടിയ കാറ്റായ്
ഒഴുകുന്നു കുട്ടികൾ

കൊറ്റികൾ

വറ്റിയ  കുളത്തിൽ
മഴ പറന്നിറങ്ങുന്നതും
കാത്തിരിന്നു വറ്റുന്നു കൊറ്റികൾ

നിന്റെ വാക്കുകളിൽ നിന്നും

നിന്റെ വാക്കുകളിൽ നിന്നും
ഒഴുകിത്തുടങ്ങിയ പുഴ
എന്നെ കടലെലെത്തിക്കുന്നു

പ്രിയ വെളിച്ചമേ

 നിൻ വെളിച്ചത്തിലെന്നി -
രുൾ പോലും വെളുക്കു- 
ന്നെൻ പ്രിയ വെളിച്ചമേ

മുല്ലകൾ

രാത്രിയിലേക്കെന്നെ
വിളിക്കുന്ന  മുല്ലകൾ
വിണ്ണിലും മണ്ണിലും

നീ തെളിഞ്ഞ ആകാശം

മൂടിക്കെട്ടിയ ഓർമ്മയിൽ
തിരയുന്നിത്തിരി  വെളിച്ചം കിട്ടാൻ   
നീ തെളിഞ്ഞ ആകാശം!

വേഗത്തിൽ

കാറ്റുപോലും തോറ്റുപോകുന്ന വേഗത്തിൽ
നിന്നിൽ നിന്നെന്നെ
നോക്കുന്നൊരു പൂവ്

ഉള്ളിലെക്കടൽ

കണ്ണിലിറങ്ങിയവളേ
നീയെന്റെ ഉള്ളിലെക്കടൽ
തേവി  വറ്റിക്കുന്നു 

തല തിരിഞ്ഞ നിന്നെ

"തല തിരിഞ്ഞ നിന്നെ കാണെടാ കാണെ"ന്ന്
മുറ്റത്തു മഴവെള്ളം
കൊണ്ടുവെച്ച കണ്ണാടി

രാഗമവൾ

മേഘരാഗത്തിലെന്റെയനു-
രാഗമവൾ നോക്കിനില്ക്കുന്നു
സന്ധ്യയതു കണ്ടു ചിരിക്കുന്നു 

ഒറ്റയാകുവതെങ്ങനെ?

ഒറ്റയാകുവതെങ്ങനെ?
കാറ്റു വന്നു തലോടുന്നു,
മരം കൈവിട്ട ഇലകളെ! 

വലയിൽ

വലയുമായിപ്പോയവൻ
കടലിന്റെ വലയിൽ !
കര കരഞ്ഞു കടലാവുന്നു

മഴ പോകും വഴി

മഴ പോകും വഴി
വെയിലേറ്റു പിടഞ്ഞെന്റെ
മനസ്സു പെയ്യുന്നു

ഹാ !

ചുളിവു വീണ കയ്യിലെ 
മഞ്ചാടിക്കുരുവിൽ
ചുവന്നു തുടുക്കുന്നു  ബാല്യം

വാടുന്നു

ചിങ്ങവെയിൽ
മഴ തിരഞ്ഞു
മുഖം വാടുന്നു 

നീയിരുളുന്നു

സ്വയം കത്തിത്തീർന്നിട്ടും
വെളിച്ചം കിട്ടിയില്ലെന്ന
പരാതിയിൽ നീയിരുളുന്നു

.............................

ആകാശനീലിമയിൽ
ഉയരത്തിന്റെ
മയിൽപ്പീലികൾ

കടൽ നീലിമയിൽ
ആഴത്തിന്റെ 
മയിൽപ്പീലികൾ


കാഴ്ചയുടെ
മയിലാട്ടം
അനുഭവം

നമുക്കു സ്വാതന്ത്ര്യം

ഒരു വർണ്ണത്തിലുള്ളോരുച്ചക്കഞ്ഞി

ഒരു ബെഞ്ചിലിരുന്നു കുടിച്ചതാണ്

പല വർണ്ണങ്ങളിൽ നമുക്കു  സ്വാതന്ത്ര്യം

ആഴം

സങ്കടത്തിന്റെ ആഴം
കുളത്തിന്റെ ആഴം അറിഞ്ഞതിനത്ര
ആരും അറിഞ്ഞിട്ടില്ല !

മിന്നാമിനുങ്ങുകൾ

വഴി തെറ്റിയ രാത്രിയിൽ
വഴിയില്ലാത്ത വഴിയിൽ
വഴിവെളിച്ച വുമായി മിന്നാമിനുങ്ങുകൾ

പാരതന്ത്ര്യം!

സ്വാതന്ത്ര്യ ദിനത്തിൽ
കെട്ടിയിട്ട മൂവർണ്ണക്കൊടി  പറയുന്നു,
പാരതന്ത്ര്യം!

സ്വാതന്ത്ര്യമഹാനദി

.............................
സ്നേഹമഴയിൽ
നിറഞ്ഞു കവിയുന്നു
സ്വാതന്ത്ര്യമഹാനദി
......................................

ഹാ ! സ്വാതന്ത്ര്യം

സ്കൂൾ മുറ്റത്ത്
പല വർണ്ണങ്ങൾ ശലഭങ്ങളായ്
ഹാ ! സ്വാതന്ത്ര്യം

പ്രണയമുണ്ടോ എന്നറിയില്ല

പ്രണയമുണ്ടോ എന്നറിയില്ല
കാറ്റ് കടലിനെ വിട്ടു പോകുന്നില്ല
കടലിളകി മറിയുന്നുണ്ട് !

ഉമ്മ

ഉമ്മയുടെ ഉമ്മ!
പകരം വെക്കാനില്ലാത്ത ഉമ്മ;
ഉണ്മയുടെ ഉമ്മയും ഉമ്മയുടെ ഉണ്മയും  

ഉയരമറിയില്ല!

ആനന്ദത്തിന്റെ
ആഴം അനുഭവിക്കുന്ന
മീനിന് ഉയരമറിയില്ല!

മഴയെ കുറിച്ച് മൂന്നു ഹൈക്കുകൾ

ഒരു വരിയിലൊരു
മഹാകാവ്യം രചിക്കുന്നു
മഴയാം മഹാകവി
        ***
ഒരു തുള്ളിയിലൊരു
ജീവിതക്കടൽ തീർക്കുന്നു
മഴയാം മഹാശില്പി
      ***
ഒരു പെയ്ത്തിലൊരായിരമുമ്മകൾ
കൊടുത്തയക്കുന്നു
മഴയാം മധുരപ്പ്രണയിനി
     ***

ഇല്ലാമരത്തിലെ...

ഇല്ലാമരത്തിലെയില്ലാ കൊമ്പിൽ
പറന്നിരിക്കുന്നു ഞാനില്ലാചിറകുമായ്
ഉണ്ടെന്നൊരു തോന്നലിലേകനായ്!

കടലാസുതോണി

ബാല്യം തുഴഞ്ഞു പോയ
കടലാസുതോണിയിൽ
നമ്മുടെ മനസ്സിരിക്കെ
മഴവെള്ളം നമുക്കു മഹാസാഗരം!

മുല്ലപ്പൂവുകൾ

ഇരുട്ടിൽ ഇലകളൊളിപ്പിച്ച
മഹാപൂങ്കാവനം രാത്രി,
മുല്ലപ്പൂവുകൾ വിടരുന്നു

കുസൃതി മഴ

കളിക്കിടയിൽ
ഇറയത്ത്‌ തട്ടിവീണ്
കരയുന്നു കുസൃതി മഴ

വറ്റുന്നു

കിണറു കാണാത്ത  കുഞ്ഞുങ്ങൾ
കുപ്പി വെള്ളത്തിൻ
കുളിരു കുടിച്ചു വറ്റുന്നു .

മിഴിയിൽ

വേദനാവേനലിലകരിയുമ്പോൾ 
ഉരുകിയൊലിക്കുമെന്നാർദ്രത
യൊരു ഹിമാലയൻ നദിയായ്
മിഴിയിൽ  പ്രളയമാകുന്നു

മിഴിയിൽ

വേദനാവേനലിലകരിയുമ്പോൾ 
ഉരുകിയൊലിക്കുമെന്നാർദ്രത
യൊരു ഹിമാലയൻ നദിയായ്
മിഴിയിൽ  പ്രളയമാകുന്നു

രാത്രി

നിശ്ശബ്ദതയുടെ മഹാസാഗരമാകുന്നു  രാത്രി
മരത്തെയുപേക്ഷിച്ചു  വന്നൊരില
മണ്ണിനുകൊടുത്ത ചുംബനമെനിക്കതു പറഞ്ഞു തന്നു

മയിലാട്ടം

കാണാതെ  കാണുമ്പോൾ
കണ്ണുകളിൽ നിറഞ്ഞു തൂവുന്ന കടലിൽ
 തിരകളായ്  നമ്മുടെ മയിലാട്ടം

നിശാവസ്ത്രം

മഴയിലലിഞ്ഞ  നിലാവിൽ
കാറ്റ് തുന്നുന്നു, തൂവെള്ള-
ക്കുളിർപ്പൂക്കളുള്ള നിശാവസ്ത്രം

ഓര്‍മ്മകളുടെ തുള്ളികള്‍

ഓര്‍മ്മകളുടെ തുള്ളികള്‍ 
പെയ്യുമ്പോള്‍ 
മനുഷ്യനും മഴയാവുന്നു

കൊടും വേനലാണ്

അടുത്തില്ലാത്തവരുടെ ഓർമ്മകൾ 
മഴക്കാലത്തും കൊടും വേനലാണ്.

പ്രണയം

പ്രണയം അർദ്ധനാരീശ്വരനാക്കുന്നു,
 കഴുത്തിൽ ചുറ്റിയ പാമ്പ്‌;
തൊണ്ടയിലെ കാളകൂടം

നീ പോയതിൽ പിന്നെ

നീ പോയതിൽ പിന്നെ,
ചുണ്ടിലെത്തും മുൻപേ
മരിച്ചു വീഴുന്നു ചുംബനങ്ങൾ.  

കിളിക്കുഞ്ഞ്

കാത്തിരിക്കുന്നു  കിളിക്കുഞ്ഞ് 
കാറ്റുപോലെത്തുമമ്മയെ
കാറ്റിൽ വീണ മരത്തിൽ !

മീനുകൾ

ഏതോ വലയിലായി നമ്മെപ്പോൽ
മഴക്കുളിരിൽ പുഴ കടന്നു
വയലുകാണാൻ വന്ന മീനുകൾ.

കള്ളൻ പുഴ

മഴയ്ക്കൊപ്പം കൂടി കള്ളൻ പുഴ,
പറമ്പിൽ കയറി കൊണ്ടു പോകുന്നു 
കണ്ണിൽ കണ്ടതൊക്കെയും  !

മനസ്സിൽ

അശാന്തമായ  കടൽ
എന്റെ മനസ്സിൽ നിന്നും
മലവെള്ളം കാണുന്നു 

മിഴി

ഏതു മഴയിലും
പെയ്യുമെൻ മിഴികളെ 
മഴ മാത്രമറിയുന്നു

നിഴലായിരുളെന്റെ.....

എന്നെ മൂടുമിരുളിൽ
വിരുന്നെത്തിയ വെളിച്ചമേ
നിഴലായിരുളെന്റെ പിന്നിൽ പതുങ്ങുന്നു .

പഞ്ഞക്കർക്കടകമേ !

പട്ടിണി കിടക്കേണ്ടെന്നു
വരിക്ക പ്ളാവുകൾ, പോ
പഞ്ഞക്കർക്കടകമേ ! 

വിരുന്നു കാരൻ

കറുപ്പിൽ കറുപ്പില്ലെന്നു
കടക്കണ് ണെറിയുന്നു
മാങ്കൊമ്പിലെ വിരുന്നു കാരൻ  

കർക്കടകം

ആരോടോ പിണങ്ങി
മുഖം വാടി മുടി കോതി
കരഞ്ഞെത്തി കർക്കടകം

സ്വപ്‌നങ്ങൾ

കടലും കാലവർഷവും 
കൈനീട്ടിയെടുക്കുന്നു
കരയിലെ  സ്വപ്‌നങ്ങൾ

മരുഭൂമി

മഞ്ഞൾ പൂശി ,
കുളിക്കുവാനൊരു
മഴ കാത്തിരിക്കുന്നു മരുഭൂമി.

കൂണുകൾ

ഇടി വെട്ടി ഞെട്ടി
പേടിച്ചെഴുന്നേറ്റു
കുടചൂടി മഴകാണുന്നു  കൂണുകൾ

ഓർമ്മ

.......................
വോട്ടു ചെയ്യാൻ ചെന്നപ്പോൾ
ഒന്നാം ക്ലാസ്സിൽ നിന്നും ഓടി വരുന്നുണ്ട്
കരച്ചിലുമായെന്നെ കരയിക്കാൻ!  

തീമഴ

തീമഴ  കൊള്ളുന്ന കുഞ്ഞുങ്ങൾ
മഴ കൊണ്ട നമ്മെ വിളിക്കുന്നു
ഗാസയിൽ കുളിർ തൂകുവാൻ !

പുൽക്കൊടിത്തുമ്പിലവൾ

ഇറ്റിവീഴാതെയിടവഴിയിൽ
എന്നെക്കാത്തു നില്ക്കുന്നു
പുൽക്കൊടിത്തുമ്പിലവൾ  

സൂര്യൻ

കറുപ്പിലൊളിച്ച വെളുപ്പു
തിരഞ്ഞു വരുന്നുണ്ട്
സ്കൂളിലെക്കൊരു സൂര്യൻ

'മഴ'

മനസ്സിലുള്ള 'മഴ'
വാക്കിൽ പെയ്തത്ര
വയലിൽ പെയ്തില്ല! 

വയലേ

മിഴിയും മഴയുമൊരേ താളത്തിൽ
നിന്നിലേക്കൊലിച്ചിറങ്ങുന്നു
 വയലേ നീ തരിശാകുമ്പോൾ 

മഴ

വയലിൽ വീണു
ചെളി കുടിച്ച മഴയെ
മീനുകൾ തൊട്ടു നോക്കുന്നു 

തിര

നിന്നിൽ നിന്നിറ്റിയ  തുള്ളിയിൽ
ഞാനൊരു കടലായ് നിന്നിലേക്ക്‌
തിരയുമായ് വരുന്നു

വളയാതെ

വടികുത്തി നടന്നിട്ടും
ചൂരലിന്റെ ഓർമ്മ
വളയാതെ കൂടെ നടക്കുന്നു.

പൂവു വിളിച്ചപ്പോൾ.

പുഞ്ചിരിത്തോണിയിൽ
മിഴിനീർപ്പുഴ കടന്നു
നാമൊരു പൂവു  വിളിച്ചപ്പോൾ.

പാടുകൾ

പടുത്തുയർത്തിയ
പടവുകളിൽ സ്വപ്നം-
 വീണു പൊട്ടിയ പാടുകൾ

ആഗ്രഹക്കിളികൾ

പുര നിറഞ്ഞിട്ടും
പുറത്തെത്താതെ
ആഗ്രഹക്കിളികൾ

ഹൈക്കു

ഒഴുക്കുന്ന  

അഴുക്ക്  

പിഴ.